• لكلنا عشنا في أكا أيمات جانفي فيفري مارس ألفين وحداش، نشوة متع حرية، نشوة حتى الوضع الأمني والإقتصادي والسياسي المزي وقتها ما نجمش يقومنا منها.

    كنا محصورين ومش عارفين على روحنا وين ماشين، لكن ، كنا أحرار ، حرية قالولي الكبار ألي ما خلطو على كيفها كان وقت إنقلاب 87 .. 

     

    مشا زمان وجا زمان،  وجات الحركة الإسلامية لتونس ، وشدو البلاد ، وقالو نحنا حكومة منتخبة وشرعية   (كذبة اسلامية حلال ، ومحاولة واضحة لإعادة كتابة التاريخ ) 

    الحاصل قمنا مالنشوة الثورجية لقينا روحنا في نكبة وطنية.  الحكومة تفصلت في مكتب النهضة في مون بليزر، وتوزعت الحقائب(في المرحلة المؤقتة الانتقالية هاذي .. ألي لوكان جات الدنية دينية، يتم فيها تجميد الأسعار والمعاهدات الكل ، وتتم المصادقة فيها على حكومة تصريف أعمال ، حتى لين يحضر المجلس التبسسي دستور  .. وكهو باع وروح ) 

    في عوض هذا شفنا عباد، شافو في أنو من حقهم أنهم يخلصوا سنين حرمانهم من السلطة، عباد ما قاومت النظام السابق ، إلا باش تاخذ بلاصتو. عباد ذات مرجعية إمبريالية/فاشية لا تعرف إلا الغاية تبرر الوسيلة ، فلا حشمة ولا جعرة في إعادة التجمعين التائبين إلى النهضة إلى أرقى المناصب ولا يسلم كل من عارضهم من تهم "أنت مسيس" وطبعاً "أنت تجمعي" عمل خارجي وما تبع ..  

    وأعرف أن نعتك الإسلامي بنعت فهو حامله... 






    الحاصل، هاذم الأسباب ... وين وصلنا هذا ؟؟


    (نعرف ألي انتوما تعرفوا هذا لكل ، لكن المعطيات تذوب في اليومي ، ولازم نرجعو خطوتين باش نفهمو روحنا وين ) 


    بكل أمانة باش نسألكم :   شنية رايكم في حالة الحرايات في تونس اليوم ؟

     

     

     عندنا في تونس إلى حد توا قوانين فاعلة وقاعدة تطبق تنجم تحبس الصحفيين على خاطر أرتيكل، عندنا قوانين تنجم تشد بهم الحبس على خاطر كلمة، عندنا قوانين تنجم تشد بيهم الحبس على خاطر ستاتو فيسبوك... 



    نحب ناخذ قضية الشابين جابر الماجري وغازي الباجي مثلاً .. 


    برشة عباد ما تعرف شي على جابر وغازي، وحتى إلي يعرف ،  يعرف جيست إنو واحد سب في الفسبوك شد الحبس .. لا أكثر ولا أقل. 

    نحب ناخذ دقيقتين من وقتكم باش نحكيلكم على زوز شباب، تم القبض عليهم في قضية رأي، ملفوفة في قميص قضية حق عام وتم فيها كل شي استعجالياً تقول قاتلين روح .. 


    بعد نشر كل من جابر و غازي ما تم إعتباره على أنو "رسوم مسيئة" .. تم الحكم عليهما بسبعة سنوات ونص حبس وهرسلة جسدية ونفيسة في سجون وزارة الشؤون الداخلية الدينية.

    غازي نجم يهرب لرومانية ، وبذلك يصبح أول لاجئ في "تونس الثورة"،  تنجموا تلقاو محاورة عملتها معاه ليليا  هوني يحكي فيها هو خير مني علاش وكيفاش. 



    أما جابر ف مكانش عندو نفس الحض، ويقبع توا في الحبس، تحت ضغط يومي ، من هرسلة وقمع. 


    تشكيل لجنة دعم  




    المهم ، هذا مع تزامن إندماج وزارة الداخلية مع وزارة الشؤون الدينية ، ما ينجم يثبتلنا ألي الحاكم ما ينجم تكون كان كلب لا عندو لا أصل ولا همة يتبع عصا إلي يحكم فيه ويتفنن في هازان القفة. والمشكل الحقيقي يتعدى عدم كفأت الحكومة ومشروعها المجتمعي الفاشي ، إلى إنو المؤسسات في تونس كيف الزرزومية ، لا لون  ولا قدر.  بعد ما كانوا يتفننو في نزع الحجاب قدام الليسي توا ولاو دعاة دينين، غدوة لوكان  تشد مية الجريبي إلا ما يطلعوا بزازل.


    وبحيث نجمو مع التصعيدات هذي نسلمو على الحريات الشخصية في ضرف عامين ثلاثة على الأكثر .. ونرجعو ، تمد راسك تاكل الكلاك !! 



    تحياتي وندعولكم إلى موسم هجرة إلى الشمال موفق..      


    1 commentaire


  • عندي قريب العام ما كتبتش فيه كلمة تصلح، بخل مني؟ غاطس فالخرم ؟ ندز في القراية باش نورق؟  أي ممكن شوية، شوية.. 

    أما علاش بالحق ؟  وراسكم متيقر وفادد .. أي عديت قريب السبعة شهر هاذم في حالة ديبريسيون مزمنة .. علاش ؟ ماهو من *** همكم هاو علاش ..! كيف  ما يقول جلال بريك (حقا وين حيو هذاكة  ؟)



    ياخي حال البلاد يفرح ولا يخلي شكون ينجم يفرح نص ساعة هوا؟  من مصيبة لمصيبة.. (كل مصيبة كتبتلها أرتيكل مفصل ومطول في أكال كنش إلي مازال من عام الحرب.. تو نلقى وقت ونحطهم هوني) 


    Dépression

    اه سامحوني نسيت ما سألتش عليكم، وخذاني الكلام... شحوالكم ؟؟ شعمل فيكم ألفين واثناش ؟ قداش من مصيبة تعدات على راسكم ؟
    تنابزتو مع قداش من سلفي وتهنتلتو من عند قداش من بوليسي؟ طلعلكم السكر قداش من مرة وانتم تسمعوا في لطفي زيتون ؟ وقداش ركبكم الغزول قدام الكذبة الفاشية متع 'الشعب إنتخب حكومة 
    شرعية ' ؟


    لباس مالة ؟ ......... أية باهي الحمدالله عليكم .. 


    تتذكرو  أكل أرتيكل الصغير إلي كتبتو على جماعة الهاكر سبيس .. ؟
    لا ؟؟ بهاي أهوة هوني ...دزو اعملوا طلة بعد ..    

    الحاصل مشيت شفت اكل جماعة وحكيت معاهم .. لقيتهم مجموعة شباب الخمسة والخميس ... عجبني خاصة عندهم مشروع ... مشروع اسمو "حزب القراصنة" ..  ليلة ألي سمعت بالمشروع هذا ، عديت ليلة نبقق في الانترنات نقرى  في كل كلمة تكتبت على احزاب القراصنة .. 


    [الحاصل مش باش نطول عليكم ، حزب القراصنة مهوش موضوعنا اليوم ... ذكروني بلاهي باش نكتب عليه حكاية كاملة ... ]


    نرجع لعلاش جبدت حزب القراصة ...  وقت شفت الجماعة هاذم ، لقيت أول مرة في تونس شباب مستعد باش يحرك ترمتو ويفك عليه من الحالة الهستيريا التنبرية الثورجية العامة ألي غاطسة فيها البلاد ، وقرروا باش يلمو رواحهم ويعملوا حزب ينجمو بيه يخرجوا من أسر الستاتوات الفايسبوكية والتغريدات التوترية...

    حاجة لوكان تلقى الدعم الإعلامي المناسب تنجم تعطي بديل ثوري شبابي واقعي للبلاد ..    




    الحاصل،مش باش نطول عليكم..  علاش حبيت نرجع نكتب هوني: 


    1) الفيسبوك : الفيسبوك يعطيك الإحساس انك قاعد تخطب في حشد .. والحقيقة انك تكتب عالبحر 
    2)  التويتر  :  أتعس و أتعس  .. في التويتر دخل منا خرج منا .. ما يصلح كان للتبزنيس والناس الفياسة (من غير ما تبداو تضربوا بالحجر ! ) 


    وانا بصراحة شفت ما شفت .. وعندي برشة ما نحكيه 


    ملتقانا بعد نهار ولا زوز ..   



    وما تنساش ترجع تبوك مركي البلوغ      

        


    votre commentaire

  • Ça fait assez longtemps que je voulais écrire sur le #HackerSpace Nawaat (déjà le nom est assez intrigant), mais avant de pouvoir écrire sur eux, il fallait y-aller sur place et rencontré ces jeunes «Hackeurs». Et c’est ce que j’ai fait.

    En entrant le -notoire- siège de Nawaat (le blog communautaire #1 dans le monde arabe -à mon avis-) j’ai été agréablement accueillis par de jeunes gens, motivés, enthousiastes et très doués dans ce qu’ils font.

     

    24sur24.posterous.com/nawaat-hackerspacetn

     (crédit photo:  http://24sur24.posterous.com/nawaat-hackerspacetn )

     

    Lire la suite...


    votre commentaire
  •  

    حدث الجبالي فقال  (أو أراد أن يقول و نحنا طلعنا بهايم نفهمو كان المعاني الحرفية ..وما فما كان جماعة النهضة إلي طلعوا يفهموا الاستعارات! )        -الحاصل قال-      :
     
     
     

    "
    (برشة تصفيق ... ما نعرفش علاش.. أما تصفيق ) 
    ...
    البعض ربما يقول هذه مدونة دينية .. لا نفرق .. هذه مدونة ربانية !  لقد كلمني أخ من من باب بحر ما شاء الله .. هذه إشارة ربانية .. وسنفتح أزنقة المدينة إن شاء الله ... من هنا بدء الركوب (218 بإعتبار السائق) .. ومع الركوب نواصل .. هكذا بدأنا وعلى موقفنا ثابتون .. وثقتنا في الله أولاً وبن علي ثانياً ... أبشروا يا اخواني أنتم أمام مدونة تاريخية ... مدونة ربانية ..في دورة شرفية جديدة إنشاء الله (في القنطاوي ! ) .. لأننا ضحكنا عليكم للعنكوش بالنظام البرلماني و ثلاثمائة نقطة وراس الفجل... ولهي لعنة/خلافة لأبد الدهر !   

    مسؤلية كبيرة قدمنا يا وخياني .. إنا نكفرو ونخونو كل من هو يعترض معنا في الأراء .. وقريباً في الأسواق ... دمهم مباح ... لا يهم يسار يمين .. مناضل أو غير مناضل يا اخواني .. فإن لم ينبطحوا ويتحولوا إلى غلمان كالمرزوقي وبن جعفر فهم بمعونة صفحات الهانة ورقاد الجبانة بحول الله كفارة مرتدة عاشقي الخمرة و طبعاً عملاء للنظام السابق ... عبد النصر العويني مثلاً

    الشعب عطانا ثيقتو .. الشعب خذينا ثيقتو ... بش إندموه في النهار إلي سمع فيه بجد والدين النهضة وطمع في بلاصة في الجنة .. 

    والسلام عليكم يا وخيان وكل عام وأنتومة دغف تنتخبو في البرامج الإقتصادية والاجتماعية الربانية .. 

    ..."
    (صفق وإلا ما تصفقش ..توا كيف كيف .. البلاصة والوزارة وضمناهم ! ) 
    ----------------------

    H jbéli



    الحاصل يا جماعة .. بالنسبة لكل من مازال ما فاقش .. راهي في طريقها نحو هردة ربانية من الطراز الأول .. من استهداف المناضلين .. وتخوين المعارضين .. التحالف مع الأطراف العميلة .. الداخلية منها والخارجية .. والكل يهون أمام الكرسي ...

    ونحن كيف العادة .. شادين نبرو .. هما كل مرة يطيشولنا عضمة ونحنا نقعدو نلكلكو فيها !  هاو مرة شوية هوية ..على شوية قيام دينية .. على شوية  سعاد "أمزوغي" ..وهما عندهم ما يقارب فترة ولاية أموية يوزعوا في الحقائب و يروضو في الإعلام .. 


    تصبحون بين تونس وتونستان .. فيما يسمى بالإمارة القطرو-تونسية, ذات التوجهات النهضاوية تحت قيادة الخليفة السادس حمادي الجبالي قدس الله سره وعضم أجره(من عضمة) وزاده في طول شلغومته إنشاء الله !   
     
     

     


    votre commentaire